Auso eis chöit dir mir gloube, i ha würklech sehr lang überleit ob i die fougende Biuder ächt i mim Blog söu ibinge, wüu ja, sisch würklech ä Beleidigung fürs Oug. Aber i ha de gfunge, dass das ächt jede muess gseh ha und i muess eifach öpis drzue säge, wüu i finges unfassbar.
Werum lahtme zue, dass uf sire Siite (i dem fau: PartyGuide) so eländ hässlech designti Wärbig erschiint? Auso gnauer gseit geits umne Wärbig fürne Party. Sisch es Flash-fiumli wo blinket u zuckt und macht u duet (übrigens no ä Tipp: lueget d PG Site nie a wenns Stockfiischter isch… dir chönntet erblinde, im ärnscht…).
Hie zwöi Biuder woni us dere „Animation“ gnoh ha:
Bitte verzeihet mir dasi die Biuder uf mini Site due, mir wird säuber fasch schlächt drbii.
Nei auso agnoh i hät säuber sone Party-Site, när würd irgend ä Verastauter cho u wet Wärbig mache für si Event u würdmr sis Flash-fiumli schicke/ufelade. Wenn das när so würd usgseh wie das hie, de würdi das eifach nid akzeptiere. Wärbig söt ds Design vore Site nid zfest störe, sie söt ungefähr inepasse und ganz wichtig: sie söt nid usgseh aus hättse dr Fritzli (12 Jahr aut, geit id chlyklass oder so) i 5minute „gstautet“. Scho allei da die Frou im Bikini, wie die usgschnitte und igfüegt isch worde, mit dem wisse Rand. I chas immer noni fasse, i la itz d Biuder la spräche…
