Da steuts mir d Haar uf

Ha vorher gläse dass PG zäme mit Fotopick itz sone neui Foto-Services Siite het. Ok hani mau drufklickt bir Startsiite u när chunnt eifach wiedermau sone lieblos und eifach nid sehr professionel würkendi Siite entgäge:

• Rot ungerstriche, ds Läärzeiche voreum Usruefezeiche. Sorry PG Lüt, aber das gits eifach nid. Vor Satzzeiche gits ke Lücke. Ganz eifach. Macht ja o kene voremne Punkt ä Lücke. Viu Lüt dänke itz, dass das ja nüt schlimms isch, aber hey, mir rede hie vore Siite wo wet professionell sii! Was macht das fürne idruck wenn dr Text usgseht aus hätne ä 14 jährige gschribe? Sorry aber so Sache fingi eifach pinlech.
• När ds angere mit de Links. Has scho paarmau erwähnt i angerne Biiträg. Aber hie fauts wiedermau uf. Eini vo de wichtigste Regle bim Webdesign isch, dass Links sofort müesse erkennbar sii. I muess sofort gseh was ä Link isch u was Text. Hie isch dr ganz Text schwarz und nur das “Mehr hier…” isch ä link. Auso chönntme meine aues wo schwarz und fett gschribe isch, isch ä link… Aber äuäää. Werum ou.
  I nime a PG isch ir zwüscheziit rein vom PHP code besser und sicher worde aus o scho, aber dir bruchet eifach definitiv no ä WebDESIGNER und zwar eine wo sich o mit Usability befasst. Isch eifach nüm akzeptabu so Sache im 2007. Egau wie aut ds PG Design scho isch und wie gross u komplex blabla. Intressiertmi nid. Weni nidmau ä Link vo normalem Text cha ungerscheide, de isch würklech scho bi de absolut tiefste Grundlage nüt überleit worde.

Niveau

I bi mängisch scho fasch “fasziniert” vom Niveau vo de User uf PG. Oder ischs eher beängstigend? Ehm wie o immer.
I gloub uf au Fäu düe sich d Verastauter am Niveau vo ihrem Zielpublikum ou apasse. Vor paar Täg isch dä Link uf PG gsi:

I gloub vor Azau Usruefezeiche chame ziemlech eifach ufs Niveau schliesse. Nei chum, höret doch uf nech säuber lächerlech zmache…

[...] HIP HOP set!!!! Eintritt: CHF 12.-!!! [...] AB 16J.!!!

Nei das isch eifach ungerschti.

Und das Paradebispiu ischmr einisch ufdr Frontsiite begägnet, isch vo irgendemne männleche (!) Profiu…

Sorry chline, wenn di STJLE so isch wie di analphabetismus i fortgschrittenem stadium, de isch das überhoupt niemerem si DREAM, eher nightmare.

Chlini Sache…

… wo aber eifach steuverträtend si fürs durchschnittleche Niveau wo uf PG vorherrscht.

Was stellen Deine Kollegen an in den Ferien?

Aha, mou tönt super. I würd nid öppe “Was stellen Deine Kollegen in den Ferien an?” schribe, neeei äuä…werum ou.

Man beachte die rot ungerstrichni Ziile.
Ja das si de rächt viu Tickets wome da cha gwinne bi dere Verlosig. Ok Wennme drufklickt gsehtme dases um irgende ä Friendlist itragig geit (auso nid würklech Gratisitritt nimi a) und när gsehtme ou dases ä Event isch wo im Prestige isch, was natürlech d Doofheit und ds beschränkte Niveau no zuesätzlech erklärt.

Dütsch und süsch no chli augemeini verblödig

Pünktlech zu dem Erotik-Event “Amor” bringt PG ä Azeig wo sich öppe ufem Niveau vo äbe dere Verastautig bewegt. Läset dä fougend Abschnitt mau säuber düre, er isch 1 zu 1 kopiert:

50 % Rabatt für alle PG Members an die AMOR Afterparty vom 30. März! “SCANDAL” CD Release Party mit DJ Scaloni in der FESTHALLE Bern, BEA,! ab 18 Jahren!! Doors open ab 22.00 Uhr! NEW SCANDAL CD OUT NOW!! SCHICKE SMS mit Keyword: SCANDAL an 92266 und du zahlst nur Fr. 19.– anstatt Fr. 38.– für die “horniest Party ever”

Auso mir duet das weh bim läse. I somne churze Abschnitt so viu Fähler, gratuliere. Auso i fa mau a:

1. So viu Sache aues in GROSSBUECHSTABE z schribe isch ä Beleidigung fürs Oug und das söt jede wüsse dasme so öpis nid macht (das mache vilech 13 jährigi wennsi im MSN mit öperem schribe)

2. Me söt nid grad jede Satz mitemne Usruefezeiche beände und de mängisch sogar eifach zwöi “!!”, das isch nomau piinlecher (cha wieder ufe 13 jährig im MSN verwiise)

3. Sehr speziell dä Usschnitt “… in der FESTHALLE Bern, BEA,!”. Es Komma när”BEA” när nomau es Kommau direkt es Usruefezeiche. Was zum Tüfu isch das?!

4. Kennsch ä Satz faht immer gross a? “…BEA,! ab 18 Jahren!!”

5. Und ä Satz hört immer mitemne Satzzeiche uf: “…anstatt Fr. 38.– für die “horniest Party ever” “

6. Bitte schribet dä Satz doch um, daser wenigstens einigermasse Sinn macht: “50 % Rabatt für alle PG Members an die AMOR Afterparty vom 30. März!”. Mi Vorschlag wär z.B. “50% Rabatt auf den Eintritt an die AMOR Afterparty”, aber was söu das bedüte weni säge “50% Rabatt an die Party”?

Dütsch…

Auso i würd vilech nid Azeige vo angerne Sitene schaute ohni sie vilech no churz uf Rächtschribig z prüefe, isch ja nid sooo ä grosse Ufwand (jedes drittklassige Textverarbeitgisprogramm het ja ä Rächtschribeprüefig). Bi da z vorderst uf PG über die Azeig vore Miss-Wahl gstouperet und ja… lueget säuber:

Zum ersten Mal suchen wir von der Miss Bikini-Suisse Organisation die Miss Bikini Suisse 2007!  
Ja wie itz? Miss Bikini-Suisse oder Miss Bikini Suisse? Ehja.

[...] Zu Gast wird die amitierende Miss Bikini Germany sein, [...]
Amitierende?

[...] um den spannenden Tilel der, Miss Bikini-Suisse 2007 [...] 
Tilel? Aues klar…. und ds Komma nach “der” isch ou sehr spezieu.