Alternative zu Popups

Wie mir au wüsse, het PG Popups sehr gärn. Obwou die eigentlech im 2007 nütmeh gross ufere Siite zsueche hei.
Einersits muessme öpis zuegä: weni z.B. dürne Fotogallerie “blättere” und es biud wot aluege, isch dr Vorteil dases imne Popup ufta wird, dass d Übersichtssite nid verschwindet.
Aber schöner und ohni verwändig vo Popups wärs z.B. fougendermasse:

Sehr viu Siitene bruche im Moment Lightbox. Wennme da ufnes chlises Biud klickt wird när ds grosse Biud so z säge über d Siite gleit, ohni Popup, ohni dasme d Site verlaht. Uf dr Site vo Lightbox gits da o gnue Bispiu zu dem.
Itz chame mit dem leider nur Biuder zeige, aber PG brüchti ja no Text u Platz fürd Kommentär etc. Itz gits aber ä Variante vo Lightbox namens Thickbox wo genau das ermöglecht. Dert chame Text, Textfäuder etc (aues mögleche) uf das Overlay tue. Wär ziemlech cool und praktisch wie ig finge.

Bei der Verarbeitung der Anfrage ist ein Fehler aufgetreten…

Sötigi lustigi Fählermäudige chöme mir hüt entgäge weni versueche es Profil ufztue.
I meine Fähler chas immer mau gä und technischi Störige etc. Aber d Fählermäudig isch wiedermau grandios:

Dr User wo die Mäudig bechunnt het absolut ke ahnig um wases geit, abgseh vomne lustige Fählernümmerli bechunntme nid meh z gseh. Auso nei sisch eher kes Fählernümmerli sondern eher ä Casenummere, wüu d Nr änderet jedesmau.

PartyGuide-On-Tour-”Banner”

Sit neustem gsehtme ja ganz rächts quasi näb dr eigentleche Site d Wärbig für die On-Tour-Party. När hetsmi nur Wunder gno wiesi das Teil platziert hei u so. Ehm ja… es isch eifach es einzigs riesigs Biud inklusive blauem Hingergrund.

Es isch genau 1500 x 1500px gross! Ok da s nid viu verschiedni Farbe u so het ischs nume 25KB gross. Aber glich. Es gäb sicher eleganteri Variante zum die Wärbig dert z platziere… Oder im Notfau haut würklech es Biud, aber nur ä Streife mitdr höchi vor Wärbig (und nid 1500px höch) und när eifach d Hingergrundfarb i dem blau setze. I ha weder Ziit no Lust das itz gnauer azluege, sisch ja o nid würklech wichtig. Es geit ja nur um sone Wärbig wo när ja eh wieder verschwindet. Ischmr nur zuefäuigerwiis ufgfaue. Wüu ja, Grundsätzlech wennme ufere Websiite es Biud gseht wo riesig isch und zu 95% nur usere simple Farb besteit, isch eigentlech klar dases nid die optimali Lösig isch.. Da me ja ä Hingergrundfarb cha setze, da bruchts kes Biud drzue.

Redesign?

Auso i weiss ja nid ob im Hingergrund bi PG amne Redesign gschaffet wird (u drmit meini nid nur optisch sondern dr ganz HTML Code wo absolut kene Standards entspricht), aber i cha nur us dr Sicht schribe wies momentan isch.

• Kennsch h-Tags? I finge uf PG keni h1, h2, etc Tags. Die wäre für Title dänkt. Stattdesse wenn ä Titu zgseh isch mache sie dert eifach d Schrift Fett und chli grösser, drbi gits genau für das d h-Tags. Es isch wichtig dasme jedes Tag für das brucht wos dänkt isch. Wenn ä Titu zgseh isch, muessme dä ou us Titu kennzeichne.
• Links müesse ganz klar aus sötigi erkennbar sii… Uf PG gsehni nid was ä link isch und was nid. Meistens hei die genau die glichi Farb wie dr normau Text, sie wärde absolut nid hervorghobe. Mängisch isch öpis schwarzes ä link und angeri mau nid. Mängisch si Title link, mängisch nid. Bi de Event-Tipps rächts isch dr Text und ds Biud dr link, bi de Gallerie-Übersicht ischs nur ds Biud… sehr konsistent das ganze, dir merkets.
• Anstatt bi de News jedem einzelne Textabschnitt z säge “he du bisch de blau und gsehsch so und so us”, chönntme eifach ä klass für die News definiere, dert in isch definiert wie news usgseh (nämlech blau und die und die Schriftgrössi) und ou d Title imne Newsabschnitt chönntme definiere. Me würd sooo viu Platz spare im html.
• Das wäge JavaScript hani scho nöime angers erwähnt gha. D Site muess uf jede Fau ou mit deaktiviertem JavaScript vou bedienbar sii, bi PG isch das nur igschränkt dr Fau. D Navigation geit nüm richtig und angeri Sache. Unbruchbar.
• Popups: Sötme eigentlech würklech nüm bruche. Wenn dr User ä Site imne neue Fänschter wot uftue, de chaner das säuber bestimme. Popups zwinge abr dr user das imne neue Fänschter ufztue u das isch bevormundig.
• Bispiu d Kommentar-Übersicht (neuste Kommentare): Isch us Tabäue implementiert und jedere Ziile wird d Farb gsetzt (damit das Zebramuster entsteit). Das isch ä riese Overhead. Die Übersicht isch doch klar ä Lischte, auso bruchtme ou ds Element wo für Lischtene vorgseh isch worde in Html u dert chame erschno für jedi gradi und ungradi Ziile ä angeri Farb setze, auso würd das schowieder aues wägfaue im html. Wieder ziemlech viu igspart. So Bispiu hets unzähligi, i bi sicher d html Files würde 20% chliner wärde (so ganz ä grobi spontani Schätzig).
• Sache wie ‘div class=”text_klein”‘ si nid würklech dr Sinn vo dem Ganze: Sie bruche das z.B. bim ufbou vom Menu rächts (Posteingang, myWasAuchImmer etc). Und zwar für jedi Ziile…Sie Packe jedi Ziile ines div und gäbe dert d Klass a “he du hesch de chliine Text”… Nei, das isch nid dr Sinn, ds ganze isch doch ds Menu, auso packemr doch ds ganze ine Liste und gäbe dere d Klass “Menu” und definiere dass dert dr Text chlii söu sii und fertig. I ha genau einisch class=”menu” gschribe u zwar bir lischte und fertig. Wieder x mau unnötige code gspart und vorauem ds ganze semantisch (vor bedütig her) richtig gmacht.
• Geit i die richtig wie dr ober Punkt: Klasse sötte nid direkt ds ussehe beiflusse, auso klasse wie “text_klein” oder ähnlechs si nid würklech richtig. Me söt Klasse definiere wie “menu”, “navigation”, “news_block” oder ähnlechs. Auso i säge amne Element im html “du bisch de es Menu” und när isch im css definiert wie das Menu äbe usgseht. Aber i säge NID im html wie ds element söu usgseh! Wüu süsch simer wieder dert dasmr im html ds ussehe beschribe und das isch nid dr Sinn. Das wird im css gmacht. Süsch definieremr de no Klasse wie “text_rot” oder “text_unterstrichen_und_hellblau”… sone blödsinn.
• Hui zersch machi no Witze wäg dene lustige Klassenäme u itz woni churz nomau i Code ha gluegt, gsehni dass die das tatsächlech so mache. Nid nur gits d Klass “text_klein”, sondern fürd Title (!!!) i de news bruche sie när d Klass “text_klein_bold”… Wie gseit, nomau dr vorherig Punkt läse oder no besser es Buecht über (X)Html und Css läse…

Uf au Fäu muess da es richtig Gründlechs redesign häre süsch wird dä aut Code no weiss nid wie lang mitgschleipft.

JavaScript

Jaja, JavaScript isch ä lustigi Sach, me cha viu Sache toll mache und sini Siite dynamischer ufwärte.
Aber me muess immer dra dänke dasme JavaScript bi sim Browser cha deaktiviere. Jede cha das. Wennme auso ä Websiite macht, muessme drvo usgah dass vilech ou lüüt uf sini Siite chöme wo JavaScript deaktiviert hei. Das heisst, d Siite muess ou denn no bedienbar sii.
Ja genau, dir dänket das scho richtig… uf PG isch das nid dr Fau. Deaktiviertme JavaScript, geit eigentlech praktisch nütmeh. Die ganzi Navigation isch nüm bedienbar da sie uf JavaScript ufbout (ds ufklappe vo de einzelne Navigationsiträg). Auso ds Menu links geits nüm, nüt mit “neuste Kommentare” oder “Picrating” und ou ds persönleche Menu rechts geit natürlech nüm. Wow.
Grad bire Navigation sötme sowiit wie möglech uf JavaScript verzichte und süsch emu sicher ä alternative abiete, schliesslech isch d Navigation so ziemlech öpis vom wichtigste ufere Siite. Geit die nid, chumi ja niene häre.
Auso ä witere Grund fürnes Redesign…
Übrigens chame das und no witeri lustigi Sache gäbig mit dr Web Developer Toolbar füre Firefox teste.

Kreativi Fählermäudige

Auso ufe fougende Punkt bini eigentlech eher Zuefäuig gstosse. Es geit hie um grossartigi Fählermäudige wo ächt sötte id Gschicht igah… Grandios! I bi i mim Postiigang gsi und ha es Mail beantwortet (mitem hake gsetzt dases es söu lösche nachem antworte) und woni wieder im Igang bi isch das Mail no da gsi. Itz isch das äuä nur es Refresh-Problem gsi. Auso ds Mail wär scho glösche worde, i has haut eifach no gseh. Ok drücki ufe Lösch-Chnopf und wots nomau lösche. När chunnt mir die fougendi wunderschöni Fählermäudig entgäge (gseht eis-zu-eis so us, uf wissem hingergrund):

FEHLER !!!!!!

Wow! Umwärfend! Wär hetsech die extrem viusagendi Mäudig nur usdänkt? Und de no mit so viu schöne Usruefezeiche und ersch no es Läärzeiche vor de Usruefezeiche… *schauder*. Auso die Mäudig chunnt wennme versuecht es Mail z lösche mitere ID wos nid git oder haut äbe nüm git. Chöiter übrigens säuber ganz eifach usprobiere, eifach fougendi Siite ufrüefe mitere ID wos i euem Postiigang nid git (am beste ä riese Zahl): http://www.partyguide.ch/msg_del.php?id=9999999999999

Ehja klar das isch nüt grossartig schlimms, aber macht scho chli ä biuige idruck und gseht eifach nach gebaschtu us.

Blogs uf PG

Ok i wot itz hie nid drüber schribe, dass d Blog-Funktion uf PG ä ziemleche Witz isch und 95% vo de User dr Sinn vomne Blog nid verstange hei u stattdesse dert eifach drischribe wie fescht liiiiiiiieb sie ihri kollege hei und ähnlechs zügs. Aber ä PG-User hetmi ufne chline Bug ufmerksam gmacht.

Schribtme im Internet Explorer ä Blogitrag und tippt ä URL ii (auso z.B. www.google.ch oder vo mir us ou http://www.google.ch) de wird die ou us Link erkennt und blau ungerstriche u me cha drufklicke. Auso so wies söt sii.

Im Firefox isch das chlei angers. Dert chame igäh wasme wot, es wird nid us Link erkennt und blibt eifach normale Text.

Merci nomau a dä PG-User womi da druf ufmerksam gmacht het. Bi immer wieder dankbar über Sache wo dir entdecket, schribet mirs nume. Entweder hie aus Kommentar oder (welch Ironie) uf PG mitere Nachricht a mi (ale1981).

Internet Explorer sieht rot, Firefox nicht

Öpis het mi eigentlech scho sit langer Ziit “ufgregt”. Nur bini dem bis itz nie gnau nachegange. Und zwar isch das fougendes: Wenn me uf PG es Mail bechunnt, de steit ja irgendwas vo “Posteingang 2 neue Mails” zum Bispiu. Im Internet Explorer erschiint das i sattem rot, im Firefox auerdings in schwarz. Itz isch ja augemein bekannt dass die beide Browser nid aues glich gnau näme und so. Aber ä Farbagab? Söt eigentlech überau glich si und das ohni grossi Problem.

Internet Explorer (ob 6 oder 7 spieut ke Roue):

Firefox:

Woni churz düre HTML-Code gluegt ha, ischsmr de ufgfaue. So ungefähr gseht dr Code us:

<span class=”text_klein_bold” style=”color = #FF0000″>Posteingang 2 neue Mails</span>

Dr Internet Explorer isch ja bekannt drfür daser Fählerhafte HTML-Code so chli versuecht uszgliche u sich haut nid so würklech a Standards hautet, darum erschiint dä Text ou rot. Aber richtig söts äbe nid “color = …” sondern “color: …” heisse. De klappts ou im Firefox.

Komischerwiis isch aune angere orte im Code wo die Farbagab süsch no brucht wird, richtigerwiis “color: …” agäh worde. Nur da bim Posteingang schiints fausch zsii.

Update (7. April, 18:50h): Anschienend ischs itz behobe worde und erschiint itz ou im Firefox in rot.

Testing?

Stouz kündet PartyGuide a, dass sie bestimmti Funktione überarbeitet hei. Unger angerem gits neui Musik-Styles wome cha uswähle und ds Formular für die Igab isch ou chli gänderet worde. Aber hets äch ou öper testet bevor sie die neui Funktion online gsteut hei? Ehm hie d Antwort: Nei heisi nid.

Hie d Maske wome d Musig-stiile cha uswähle:

U wennme d Igab spicheret, wird d Maske dürne (vermuetlech chliine) Programmierfähler chlei komisch dargsteut. Überau dert wome kes Chrüzli het gmacht chunnt ä HTML-Code zum Vorschiin:

Schad, dass sone grossi u bekannti Siite anschiinend nid viu vo Teste hautet.

Merci a “Sebi” für dä Hiiwis.

Update (1. April, 10:47h):

Inzwüsche isch dr Bug behobe worde und es wird wieder normau dargsteut.