Wie wärs mitemne News-Feed

Normalerwiis ischs ja PG wo meh oder weniger sinnlosi Funktione ibout und ig duemi när drüber beschwäre.
Itz mau dr anger Wäg, i hät ä Idee fürne vo mir usgseh rächt cooli Funktion. Ok i gibes zue, i ha die Idee ja nid säuber erfunge, meh fingt das Prinzip überau im Internet i Ziit vo Web 2.0 (nur damitmr dä bescheuert Begriff ou mau hie brucht hätte…).

Auso wies dr Titu scho seit, geits umne News-Feed. Und zwar eine wo d News vo au mine Friends woni uf PG ha (myFriends) zämetreit.
Nämemr a i ha ä Fründ XYZ und dä het grad neui Fotos i sis Profiu ineta und sich ufemne myPic aklickt, de gsehni uf mire persönleche News-Site so öpis wie “Dein Freund XYZ hat so eben 5 neue Fotos hochgeladen [Vorschou vo de Pics] und sich auf einem Partyfoto markiert” etc. Dir gseht wasi meine. Ou wenn z.B. mi Fründ XYZ ä Kommentar nöime hät gschribe würdi das dert gseh.

Wär emu no ä cooli Funktion fingi. De ischme ufem loufende was sini myFriends uf PG so am tribe si.
Ob sinnvou oder nid, weissi säuber nid, aber finges no lustig vom Asatz her.

Back again

So itz hani es zitli nüt gschribe gha, grad chli viu ztüe gha bim job plus no paar angeri Sache.
Uf au Fäu hani gfunge i schribe drfür itz mau wieder chli öpis…

Und zwar gits ja paar tolli neui features uf PG. Ufdr Startsiite wennme chli abescrollt gsehtme so sinnvoui Sache wie “wär het am meiste WOWs becho hüt” oder “wär het am meiste kommentär gschribe” etc. Naja cha sii dass so öpis gwünscht isch worde vo teune user, aber die söuesech bitte hie mäude und mir erkläre was das genau bringt. So leids mir duet, das geit für mi eifach wieder mau ungers Kapitu “Sinnlosi Funktione”. Wos doch gnue angeri Sache gäbt zum neu mache…

När gits ja no die Schwizercharte ufdr Startsiite… Schön wär wenns sich würd merke weni Kanton Bärn uswähle, dass bim nächste Login ou grad direkt Bärn usgwäut isch. Fändi no cool.

I muess nomau ufs augemeine Erschiinigsbiud cho. I weiss ja nid ob im Hingergrund bi PG amne neue Design gschaffet wird, i hoffes eifach mau. Mir hei ds Jahr 2007! Die Siite gseht us wie usde Afäng vom WWW… Mau übertribe gseit. Cha nur nomau z.B. ufs Ani-GIF verwiise wo eim entgäge zuckt wennme es Mail abgschickt het. So öpis het ufere moderne Siite nüt z sueche. Wot garnid nöcher druf igah uf Sache wie Frames, Tabäue-Layout, Style informatione im HTML, etc. Es wüsses ja die Lüt wos müesse wüsse. Und ou ds Logo, d Farbe, d Gstautig… das isch aues sehr Renovationsbedürftig.

Oder ufdr Startsiite wo die “News” si. Die bestöh ja usemne Titu und när ä Textblock. Dr normau Awänder erwartet daser ufe Titu cha klicke und das dr Link zum vouständige Artiku isch (das isch quasi Standard im www)… Aber hie isch dr ganz Textblock ä link (nid würklech schön dr Effekt dass när dr ganz Block ungerstriche wird…) und dr Titu isch ungloublecherwiis ds einzige wo ke Link isch. Isch nur es Detail, aber ischmr grad i Sinn cho…

So auso, ha mau wieder paar Pünkt müesse loswärde.

Prioritäte setze?

Es git ufdr PartyGuide-Startsiite zwöi Wörter wo mi immer i Angscht und Schrecke versetze. Weli zwöi das si? Die fougende: Neue Funktion!

Und die Tage ischs wiedermau so wiit. PG lanciert die grandios neui Funktion “SuchAbo”. Scho bim Name chertsmr dr Mage, aber das isch natürlech subjektiv. Mi erinneret haut aues wo ds Wort “Abo” im Name het, a so Horrorgschäftsmodäu wie “Klingeltonabos” oder “jetzt neu im Sparabo”.

Um was geits? Ok mit dere tolle neue Funktion chame ä Membersuechi abspichere und “abonniere”. Z.B. woti nach aune Lüüt zwüsche 23i und 26i usem Kanton Bärn mit Foto i ihrem Profiu sueche, när spicheri die äbe us Abo ab und i bechume jede Abe es Mail mitde Suechresultat! Jede Abe! Darum auso es Abo. Mir erschliesstsech dr Sinn nidso ganz, weiss nid wär die Funktion söt bruche bis uf paar krassi Gäängschter wo sich d Suechresultat vo 15 bis 17Jährige us ihrem “Hometown” abonniere. I gloub i ga ga chotze.

Ok gibes ja zue, isch nid sehr Objektiv mi Bricht da, aber söuer o garnid sii. Finge eifach es würd sooo viu Bousteue gä uf PG, i würd eifach d Entwickler eher dert isetze und doch nid no meh unnötigi Funktione implementiere. Darum ou dr Titu vo dem Bitrag “Prioritäte setze”.

D Lischte vo Sinnlose Funktione uf PG isch läng und irgendwie ischs ja scho lang ke Party(föteli)-Site meh. Es entwickletsech zumne Dating-Portal oder zumne MySpace-Klon.

Lustigi Idee: I fa mau mitdr Lischte a vo sinnlose Funktione, bitte i de Kommentär zu dem Artiku witerfüehre:

Blogs

MyPic-Alert

User Profil als virtuelle Karte verschicken (het dert scho jemaus öper drufklickt?)

Notizen (wome zu jedem Profiu öpis cha drichritzle für sich säuber…)

Möchtest Du xyz kennenlernen, dann klicke hier. xyz sieht dies nur wenn sie dies bei deinem Profil auch angegeben hat (oder so ähnlech, isch gottseidank entfärnt worde dä seich)

D Steueagebot (ohja die suechi immer uf ersts ufere Partysiite…genau)

ca. aues ungerem Menupunkt “Entertainment”, z.B. d Music-News wo dert sii… viu spass bim läse ohni izschlafe

ca. aues ungerem Menupunkt “Mobile” (Ringtones…brucht ke witere Kommentar drzue)

Ok itz sit dir dran mitem witerfüehre vo dere Lischte.