Ohne Worte…

Eifach mau das Biud vom PG-User “mikem” (übrigens irgend ä Regionalmanager vo PG) inezieh. Ischmr hüt ufdr Frontsiite entgäge gsprunge…

Wie grusig darf Wärbig sii (Part 4)

Und wiedermau ä neue Flyer womr sofort dür sini hässlechkeit is Oug gsprunge isch. Und zwar ischs wiedermau eine vom Pascha. Viu muessi drzue nid säge, sisch praktisch aues im letschte Artiku übere Pascha-Fyler gseit worde und das aues giut hiu genau glich.

Schnäu zämegfasst:

• Wieder bruchtme mindestens 4 verschiedni Schriftarte. Jede Text ire angere Farb usw. Eifach es wahlloses Gmisch
• Lieblos härepflanzit Föteli
• Und dr absolut Hammer isch ja ds PG-Logo unge rächts, wie das inegflickt isch worde… Vorauem gsehtme dases anschienend vor PG-Websiite per Screenshot (!!!) usekopiert isch worde! Erkenntme am zwöiteilige Hingergrund wo so isch wie ufdr PG-Siite… Geits no piinlecher?

PartyGuide-Logo

Dr erst Tag woni öpis vo PartyGuide ghört und gseh ha isch scho ziemlech lang her, aber a öpis chanimi no genau erinnere: I ha mi scho denn ufe erst Blick abem PG-Logo gfragt. Drum hani gfunge i schribe hie no churz mini Gedanke zu dem Logo häre.

Auso eifach mau ganz subjektiv gseht ds Logo nüm Ziitgemäss us (nei itz keni Gedanke à la “aber das Logo isch bekannt und dr Wiedererkennigswärt isch gross blabla”, i weiss, uf das chumi no).

Aber wasi mi vorauem immer scho gfragt ha, wo isch dr Zämehang zure Partyföteli-Siite? Oder augemein zumne Usgangs- oder Freizitportal? Hm vilech sis ja die lustige Pünktli? Ahh nei doch nid, da handlets sich ja um d Braille-Schrift, ou genannt Blindeschrift! Und itz nomau d Frag: Wo isch dr Zämehang? Auso ig fingene ou nach langem Sueche nid.

Ok die Pfiili chame ja vo mir us bhaute, vo mir us gseh si die dr Wiedererkennigswärt vo PG. Die mache ds Logo us. Vor einiger Ziit hani sogar mau am Mr. PartyGuide (Jason) ä grobe Vorschlag gmailet wieme ds vorhandene Logo chli chönnt “modernisiere”. D Pfiile hätti biibhaute, d Schriftart ou. Dr Jason het de nur gmeint gha das chöm garnid i frag ds Logo z ändere, CocaCola würd das ja o niemaus mache. Ehm… Ok mir wei PG itz aber nid mit CocaCola vergliiche oder? D Chärnussag stimmt sicher, wie gseit, me darf ds Logo sicher nid komplett ändere, aber me chas ar Ziit apasse. Die wichtige Element wie d Farb, d Pfiile und d Schrift chame ja wiederverwände. Es git viu grossi Marke wo über d Ziit ihri Logos fortloufend modernisiert hei.