Wahllos Kommentär lösche?

Wie gö sie äch bi PG vor wennsi Kommentär unger Pics lösche?
I meine einersiits gits bi deune Föteli es riese gstürm, pubertierendi Teenies gö ufenang los u beleidige enang vom gröbschte, interessiert aber bi PG niemer.
Aber me darf eifach jaaa nid ä Wärbepartner vo PG “beleidige”. Die Kommentär wärde glösche. Oder zum es aktuells Bispiu näh: Es git ja da das Fotoshooting vom legendäre PG-Kalender mit dene haubnackte Froue.
Itz hani vor paar Täg bi eim vo dene Pics ä kritische Kommentar häregschribe und er isch innert paar Stunde verschwunde. Geschter hani bimne angere Pic usdr gliche Serie öpis häregschribe und zwar hani gschribe dases zwar sicher ä schöni Frou isch uf dem Foto aber i fragemi wele Maa so eini us Fründin wot?! I meine wot ig ä Fründin und när steuise mine Kollege vor und jede vo dene Kollege seitmr “ahh ja die hani ou scho nackt gseh”! Auso das isch mini istellig…
Öppe so hani das unger das Pic gschribe und dr Kommentar isch natürlech wieder glöscht worde.
De löht doch d Kommentarfunktion grad wäg.

Zensur zum zwöite

I ha hie es ganz lustigs Spieli für euch aui. Aber mau ganz vo Afang a. Wiemer scho wüsse wärde Mails uf PG zensiert, i ha denn ds Bispiu bracht gha wennme näme vo Konkurrenzsitene igit und die dür “*” ersetzt wärde. Aber itz zeigi euch no öpis witers: Es wärde nämlech ou Fluechwörter und süsch “schmutzigi” Usdrück gfiuteret und dür stärnli ersetzt. Das wär ja no eis, aber ds lustige isch dass dä Fiuter nur ir Lag isch eis Wörtli zfiutere.

Es Bispiu: Schribet imne Mail (am beste a euch säuber zum teste) zum Bispiu “Arschloch arschloch arschloch”, ok me würd itz erwarte dass dr Empfänger nur Stärnli gseht. Aber fausch, er wird fougendes becho “********* arschloch arschloch”. Sprich: Dr Fiuter suecht ob im Mail ds Wort “Arschloch” vorchunnt und wenners fingt dueters zensiere und fertig. Aber dr Fiuter dänkt nid dra dass das böööse Wort ou meh aus einisch chönnt vorcho.  Es git no ganz viu angeri Wörtli wo ou zensiert wärde. Probierts us, spielet drmit. Wot itz nid meh Wörter verrate, isch ja nüm lustig süsch.

PS: Tschuldigung für die hüüfigi Benutzig vom Wort “Arschloch”.

Zensur?

Muessme ächt vor Konkurrenz angst ha wenn me sich scho säuber “ds gröschte Freizitportal vor Schwiz” nennt? Es schiint so. Schribet mau uf PartyGuide öperem es Mail und im Inhaut erwähneter eini vo de Konkurrenzsiitene, auso z.B. “tilllate” oder “lautundspitz”. Dr Empfänger wird anstatt “tilllate” nur “********” zgseh becho. Ungloublech aber wahr!

Probierets us: Schribet am eifachste euch säuber es Mail (ja das geit ou) mitem Inhaut “tilllate” und lueget i eue Postiigang.