Ufdr Startsiite wird im Rahme vo dene Musiknews wos immer het, ds neue Aubum vom DJ Antoine präsentiert. Klar, dä dazueghörig Text isch nid vo Partyguide, i weiss, aber i ha so müesse lache (und mir glichzitig a chopf glängt) woni das gläse ha. Hie das Meischterwärch:

Die Auswahl an internationalen Tracks, sei es mit einer osteuropäischen, italienischen oder französischen Note, ist revolutionär und lädt in den Festtagen zum Feiern ein. Im Weiteren sind auf der CD brandneue und exklusive Remixe von Piero Esteriore wie „Io vivo“ und „Tell me“, das gemeinsam mit dem Sänger von P. Diddy - Mario Winans - gesungen wird, zu hören.

Ist DJ Antoine philosophischer geworden? Vielleicht. Sicher aber auch reift sein Werk mit jeder CD. Der neue CD-Titel „Vive la Révolution?“ ist neu und bewusst inhaltliche Aussage sowie Frage zugleich.

DJ Antoine beweist immer wieder, dass er Bisheriges musikalisch hinterfragt, bewusst provoziert und Unerwartetes wagt. „Vive la Révolution?“ (Lebt die Revolution?) ist eine unerwartete Frage und Anlehnung an den alten weltbekannten Slogan Aufständischer und Weltbürger. Die Frage ist keine politische Aussage, sondern soll motivieren nachzudenken. Über die Musik, unsere alten Gewohnheiten, aber auch darüber, ob gewisse gesellschaftliche Entwicklungen und Umbrüche richtig sind. Oder ob Revolutionäres manchmal das Bessere wäre. Zurück bleibt die klare Aussage, dass die jungen und älteren Generationen mit diesem CD-Titel aufgerufen werden, sich bewusster in ihrem Umfeld zu bewegen. Ein Weg dazu ist DJ Antoine und seine Musik.

Danke! Säute so glachet!
Meine fresse, das isch ä stinknormali electro-bumm-bumm-house CD wies im Moment grad Mode isch und ke Wäutveränderndi Sensation oder so. Nei dä Text isch köschtlech, grössers Marketinggeblubber hani gloub no nie gläse.

Ha uf informationarchitects.jp eismau grad ä sehr intressante Artiku gläse. Sisch augemein ä empfählenswärti Siite. Das isch vomne Schwizer wo i Sache Usability, Webdesign etc sehr geniau isch und ds Japan ä Firma het.
I dem Artiku geits eigentlech meh drum wie klassischi Print-Medie ir hütige Internet-Ziit chöi überläbe und de verzeut er ou uf wasme söt luege bi Online wärbig…
Hie ä intressante Uszug:

1. Reduce number of banners per page to one.
2. Increase banner size.
3. Distinguish clearly between ads and content.
4. Kill all pop up windows.
5. Forbid animated and amateurish banners.
6. No google or other cheap looking ads.
7. Hire sales staff to sell proper advertisement instead of whining that there is no money online.
8. Care as much about increasing the quality of online advertisement as you care in print.
9. Sell the books you cite, the CDs and DVDs you discuss, sell T-shirts from fashion designers you write about…

Woni das gläse ha, hani natürlech sofort a PG müesse dänke.
Luegemr mau paar Pünkt a:
1. Me söt d Azau Banner pro Site reduziere und zwar optimalerwiis uf eis…

5. Verbietet animierti und amateurhaft ussehendi Banner … Da muessi nid meh säge oder?

Nomau, sisch augemein ä super Siite, dä Maa het ächt ahnig und bis jetz hani jede Artiku läsenswärt gfunge. Er veröffentlech eigentlech uf dere Siite sine “Notize” was später mau es Buech söt wärde.

Wie mir au wüsse, het PG Popups sehr gärn. Obwou die eigentlech im 2007 nütmeh gross ufere Siite zsueche hei.
Einersits muessme öpis zuegä: weni z.B. dürne Fotogallerie “blättere” und es biud wot aluege, isch dr Vorteil dases imne Popup ufta wird, dass d Übersichtssite nid verschwindet.
Aber schöner und ohni verwändig vo Popups wärs z.B. fougendermasse:

Sehr viu Siitene bruche im Moment Lightbox. Wennme da ufnes chlises Biud klickt wird när ds grosse Biud so z säge über d Siite gleit, ohni Popup, ohni dasme d Site verlaht. Uf dr Site vo Lightbox gits da o gnue Bispiu zu dem.
Itz chame mit dem leider nur Biuder zeige, aber PG brüchti ja no Text u Platz fürd Kommentär etc. Itz gits aber ä Variante vo Lightbox namens Thickbox wo genau das ermöglecht. Dert chame Text, Textfäuder etc (aues mögleche) uf das Overlay tue. Wär ziemlech cool und praktisch wie ig finge.

Ha vorher gläse dass PG zäme mit Fotopick itz sone neui Foto-Services Siite het. Ok hani mau drufklickt bir Startsiite u när chunnt eifach wiedermau sone lieblos und eifach nid sehr professionel würkendi Siite entgäge:

• Rot ungerstriche, ds Läärzeiche voreum Usruefezeiche. Sorry PG Lüt, aber das gits eifach nid. Vor Satzzeiche gits ke Lücke. Ganz eifach. Macht ja o kene voremne Punkt ä Lücke. Viu Lüt dänke itz, dass das ja nüt schlimms isch, aber hey, mir rede hie vore Siite wo wet professionell sii! Was macht das fürne idruck wenn dr Text usgseht aus hätne ä 14 jährige gschribe? Sorry aber so Sache fingi eifach pinlech.
• När ds angere mit de Links. Has scho paarmau erwähnt i angerne Biiträg. Aber hie fauts wiedermau uf. Eini vo de wichtigste Regle bim Webdesign isch, dass Links sofort müesse erkennbar sii. I muess sofort gseh was ä Link isch u was Text. Hie isch dr ganz Text schwarz und nur das “Mehr hier…” isch ä link. Auso chönntme meine aues wo schwarz und fett gschribe isch, isch ä link… Aber äuäää. Werum ou.
  I nime a PG isch ir zwüscheziit rein vom PHP code besser und sicher worde aus o scho, aber dir bruchet eifach definitiv no ä WebDESIGNER und zwar eine wo sich o mit Usability befasst. Isch eifach nüm akzeptabu so Sache im 2007. Egau wie aut ds PG Design scho isch und wie gross u komplex blabla. Intressiertmi nid. Weni nidmau ä Link vo normalem Text cha ungerscheide, de isch würklech scho bi de absolut tiefste Grundlage nüt überleit worde.

Mir erinnere üs aui a die nid sehr schöni Loading-Animation wome gseh het wennme z.B. es Voting abgäh het.
Zur erinnerig, das het so usgseh:

Vor churzem isch das erneueret worde, PG goes Mac OS X chönntme ou säge:

Das chunnt eim z.B. entgäge wennme si Mac startet:

Nid fausch verstah, i dem Bitrag hie geits nid drum dass PG das klauet het … schliesslech wird das Lade-Symbol inzwüsche unzählige Orte/Applikatione/Websiite brucht.
Gseht emu besser us, das blaue Teil wo eim früecher entgäge gsprunge isch, isch nid grad ä Ougeweid gsi.

Normalerwiis ischs ja PG wo meh oder weniger sinnlosi Funktione ibout und ig duemi när drüber beschwäre.
Itz mau dr anger Wäg, i hät ä Idee fürne vo mir usgseh rächt cooli Funktion. Ok i gibes zue, i ha die Idee ja nid säuber erfunge, meh fingt das Prinzip überau im Internet i Ziit vo Web 2.0 (nur damitmr dä bescheuert Begriff ou mau hie brucht hätte…).

Auso wies dr Titu scho seit, geits umne News-Feed. Und zwar eine wo d News vo au mine Friends woni uf PG ha (myFriends) zämetreit.
Nämemr a i ha ä Fründ XYZ und dä het grad neui Fotos i sis Profiu ineta und sich ufemne myPic aklickt, de gsehni uf mire persönleche News-Site so öpis wie “Dein Freund XYZ hat so eben 5 neue Fotos hochgeladen [Vorschou vo de Pics] und sich auf einem Partyfoto markiert” etc. Dir gseht wasi meine. Ou wenn z.B. mi Fründ XYZ ä Kommentar nöime hät gschribe würdi das dert gseh.

Wär emu no ä cooli Funktion fingi. De ischme ufem loufende was sini myFriends uf PG so am tribe si.
Ob sinnvou oder nid, weissi säuber nid, aber finges no lustig vom Asatz her.

Eifach mau das Biud vom PG-User “mikem” (übrigens irgend ä Regionalmanager vo PG) inezieh. Ischmr hüt ufdr Frontsiite entgäge gsprunge…

I bi mängisch scho fasch “fasziniert” vom Niveau vo de User uf PG. Oder ischs eher beängstigend? Ehm wie o immer.
I gloub uf au Fäu düe sich d Verastauter am Niveau vo ihrem Zielpublikum ou apasse. Vor paar Täg isch dä Link uf PG gsi:

I gloub vor Azau Usruefezeiche chame ziemlech eifach ufs Niveau schliesse. Nei chum, höret doch uf nech säuber lächerlech zmache…

[...] HIP HOP set!!!! Eintritt: CHF 12.-!!! [...] AB 16J.!!!

Nei das isch eifach ungerschti.

Und das Paradebispiu ischmr einisch ufdr Frontsiite begägnet, isch vo irgendemne männleche (!) Profiu…

Sorry chline, wenn di STJLE so isch wie di analphabetismus i fortgschrittenem stadium, de isch das überhoupt niemerem si DREAM, eher nightmare.

Mau öpis völlig PG-loses… Aber da i ke angere Blog füehre, muess das da ine
Wüu i muesses eifach irgendwo häreschribe.

Geschter Morge isch ändlech mis vorbsteute und sehnlechst erwartete “Spieuzüg” cho. Und zwar mi iPod touch.
I bi eifach dermasse beidruckt vo dem Grät dasis eifach muess ufschribe.

Es faht a wennme ds Schachteli aluegt. Es isch wunderschön gmacht, Stiiuvou und edel. Wennmes ufduet hetme eher ds Gfüeu me het ä Luxusuhr kouft u ke MP3-Player und im erste Moment hanimi chuum getrout das Ding azlänge.
När geits witer wennmes alaht. Ds Display isch absolut brillant, schöni farbe, höchi uflösig…Eifach hammer.

Dr Wahnsinn isch eifach d Bedienig. Me rollt richtig dür Lischtene, sisch aus wäresi ä Rolle wome cha “akicke” und jederzit o wieder stoppe. Und das aues absolut flüssig. Augemein reagiert aues immer ohni verzgerige und butterweich.

Oder wennme ds Grät Quer nimmt, merkt das ä Sensor und d Asicht schautet um. I ha no nie so schön dür mini Musigsammlig chönne blättere. Aues ungloublech intuitiv. Dr Witz isch, im Schachteli hets nur ä ganz chlini Churzaleitig und das us eim Grund: Es brucht garke richtigi Aleitig. Aues isch so eifach ufbout und me muess ke Sekunde überlege wasme itz muess “drücke”.

Viu dänke sicher “ja aber Touchscreens gits scho lang”… Ja das isch so. Nur hei bisher Touchscreens gröschteteils eifach Chnöpf emuliert und nüt angers. Aber hie chani dür mini Fotos blättere, nid drücke…
Und ds angere isch natürlech Multitouch, auso Touchscreen wo meh aus 1 Druckpunkt erkennt. Das gits i kem angere mobile Grät. So chame mit zäme- oder usenangzieh vo zwöine Finger i Fotos ine und use zoome.

Genau glich funktioniert ds zoome im Browser. Dank iboutem WLAN chame is Internet und das im geniauste Browser woni je imne Mobile Grät gseh ha. Zoome, umefahre, mehreri Siitene glichzitig offe etc.
Oder ou d Integration vo YouTube isch super gmacht. Und me cha direkt uf dem iPod i iTunes-Store ga, aui Lieder vorlose, sueche und direkt dert druf choufe u abelade. Das hets ou no nie gä.

I bi würklech beidruckt vo dem Teil, ertappe mi aube wieni eifach sinnlos drmit umespiele und wenni när mis Natel id Hang nime chunnt mir das Sony-Ericsson-Teil vor wie es Ding usem letschte Jahrhundert. I meine das völlig nid übertribe, vo mir us gseh muess SO es Grät im 2007 funktioniere und usgseh.

Klar es het o sini Macke, z.B. wär viu meh möglech gsi, auso meh Applikatione. Aber das het Apple natürlech nid wöue, sie beharre druf dases eifach ä iPod isch und nid meh. Schad.
Und wo d Vordersiite us Chratzfestem Glas isch, heisi hinge unverständlecherwiis uf sone chromigi Oberflächi gsetzt wo schnäu dräckig und verchratzt wird.
Aber aues i auem muessi säge, das Ding isch ungloublech. Es Spieuzüg zwar wennmer ehrlech si, aber i ha no nie uf sone schöni und eleganti Art u Wiis mini Musig chönne mitnäh.

So, das het usemüesse
(ahja sischmr bewusst dass d Föteli vo mir absolut mies si, ha ke Digicam nur mis Handy und iSight…naja)

Wie gö sie äch bi PG vor wennsi Kommentär unger Pics lösche?
I meine einersiits gits bi deune Föteli es riese gstürm, pubertierendi Teenies gö ufenang los u beleidige enang vom gröbschte, interessiert aber bi PG niemer.
Aber me darf eifach jaaa nid ä Wärbepartner vo PG “beleidige”. Die Kommentär wärde glösche. Oder zum es aktuells Bispiu näh: Es git ja da das Fotoshooting vom legendäre PG-Kalender mit dene haubnackte Froue.
Itz hani vor paar Täg bi eim vo dene Pics ä kritische Kommentar häregschribe und er isch innert paar Stunde verschwunde. Geschter hani bimne angere Pic usdr gliche Serie öpis häregschribe und zwar hani gschribe dases zwar sicher ä schöni Frou isch uf dem Foto aber i fragemi wele Maa so eini us Fründin wot?! I meine wot ig ä Fründin und när steuise mine Kollege vor und jede vo dene Kollege seitmr “ahh ja die hani ou scho nackt gseh”! Auso das isch mini istellig…
Öppe so hani das unger das Pic gschribe und dr Kommentar isch natürlech wieder glöscht worde.
De löht doch d Kommentarfunktion grad wäg.