Wahllos Kommentär lösche?

Wie gö sie äch bi PG vor wennsi Kommentär unger Pics lösche?
I meine einersiits gits bi deune Föteli es riese gstürm, pubertierendi Teenies gö ufenang los u beleidige enang vom gröbschte, interessiert aber bi PG niemer.
Aber me darf eifach jaaa nid ä Wärbepartner vo PG „beleidige“. Die Kommentär wärde glösche. Oder zum es aktuells Bispiu näh: Es git ja da das Fotoshooting vom legendäre PG-Kalender mit dene haubnackte Froue.
Itz hani vor paar Täg bi eim vo dene Pics ä kritische Kommentar häregschribe und er isch innert paar Stunde verschwunde. Geschter hani bimne angere Pic usdr gliche Serie öpis häregschribe und zwar hani gschribe dases zwar sicher ä schöni Frou isch uf dem Foto aber i fragemi wele Maa so eini us Fründin wot?! I meine wot ig ä Fründin und när steuise mine Kollege vor und jede vo dene Kollege seitmr „ahh ja die hani ou scho nackt gseh“! Auso das isch mini istellig…
Öppe so hani das unger das Pic gschribe und dr Kommentar isch natürlech wieder glöscht worde.
De löht doch d Kommentarfunktion grad wäg.

Bei der Verarbeitung der Anfrage ist ein Fehler aufgetreten…

Sötigi lustigi Fählermäudige chöme mir hüt entgäge weni versueche es Profil ufztue.
I meine Fähler chas immer mau gä und technischi Störige etc. Aber d Fählermäudig isch wiedermau grandios:

Dr User wo die Mäudig bechunnt het absolut ke ahnig um wases geit, abgseh vomne lustige Fählernümmerli bechunntme nid meh z gseh. Auso nei sisch eher kes Fählernümmerli sondern eher ä Casenummere, wüu d Nr änderet jedesmau.

Chlini optischi uffrüschig

Das freutmi doch, isch zwar nur es Detail aber immerhin. Da das Thermometer wo bi de Föteli da isch zum Bewärte (vo 1 bis 10) het scho immer ziemlech verautet usgseh, sit neustem isch das aber dürnes moderners ersetzt worde. Gseht würklech besser us aus vorher.
Neu:

Ahja, bi de upgloadete Föteli i de Profil schiint aber no ds aute Thermometer vorhande zsii.

PartyGuide-On-Tour-“Banner“

Sit neustem gsehtme ja ganz rächts quasi näb dr eigentleche Site d Wärbig für die On-Tour-Party. När hetsmi nur Wunder gno wiesi das Teil platziert hei u so. Ehm ja… es isch eifach es einzigs riesigs Biud inklusive blauem Hingergrund.

Es isch genau 1500 x 1500px gross! Ok da s nid viu verschiedni Farbe u so het ischs nume 25KB gross. Aber glich. Es gäb sicher eleganteri Variante zum die Wärbig dert z platziere… Oder im Notfau haut würklech es Biud, aber nur ä Streife mitdr höchi vor Wärbig (und nid 1500px höch) und när eifach d Hingergrundfarb i dem blau setze. I ha weder Ziit no Lust das itz gnauer azluege, sisch ja o nid würklech wichtig. Es geit ja nur um sone Wärbig wo när ja eh wieder verschwindet. Ischmr nur zuefäuigerwiis ufgfaue. Wüu ja, Grundsätzlech wennme ufere Websiite es Biud gseht wo riesig isch und zu 95% nur usere simple Farb besteit, isch eigentlech klar dases nid die optimali Lösig isch.. Da me ja ä Hingergrundfarb cha setze, da bruchts kes Biud drzue.

Wie grusig darf Wärbig sii (Part 5)

Es isch chli unoriginell, i weiss, aber i muess glich nomau ä Flyer vom Pascha us Bispiu nä.
Bitte suechet euch doch ä richtige Designer! Oder wenigstens irgendöper wo ä Flyer härebringt wome nid grad Ougechräbs bechunnt.

Wiedermau x verschiedeni Schriftarte, Farbe wo absolut ke Bezug zunang hei und eifach nid härepasse, Text wo mau gross, mau chlii isch, mau „DJ contest“ und mau „DJ-Contest“… Nei auso Bitte, das isch lächerlech, finge ke angere Usdruck.

Lehres d Verastauter nie?

Ok das itz het nid würklech öpis mit Partyguide ztüe. I frage mi nur ob d Verastauter vo au dene Pubfest/Beachpartys/Whatever nid merke dass sie sich chli meh und neus sötte la ifaue? I ha grad vor churzem bim eMeidi gläse wie sone Party ds Kiesen so öppis vo gfloppt het. Und i dänke das wird so witer ga wenn sie sich nüt neus lö la ifaue. Cha mi erinnere wieni vor X Jahre a so Feschtli bi gange und denn immer so Coverbands genannt „Charisma“ oder One-Hit-Wonder-Gruppene wie „Kate Ryan“ oder „Vengaboys“ dert ufträtte si. Und hüt gsehni dr Flyer vom Toppp-Festival ir NPZ-Haue. Und hey, chöit drü mau rate wär dert aues so uftritt…

PG goes WordPress?

Vorher hetmr grad öpper uf PG ä Nachricht mitemne Link gschickt, merci für dä Tipp.
Gseht us aus gäbs gli ä PG-Blog, auso eine wo sie d User informiere über neui Sache etc. Emu weni das richtig interpretiere. Schiint emu aus würde sie öpis mit WordPress ufboue.
I wet itz dr Link drzue nid unbedingt hie Poste bevor das würklech offiziell isch. Uf au Fäu besteit dä Blog fang us eim Bitrag (vom 13.9.07) wo sie drin schribe dass wennme itz uf PG es Mail beantwortet, gits im Postigang es neus Symbol näb dere Nachricht (analog de beantwortete Mails i Outlook etc).
Simer mau gspannt…

Update:
Bi grad ufmerksam gmacht worde dases ja scho online isch unger „über Uns -> User Infos“, merci füre Hiwies, has nid gfunge gha.

PornoGuide.ch

Ahh itz wird mir schlagartig klar werum PG ou d domain PornoGuide.ch kouft het…
PG het itz ou ä Kalender…

Bitchiest PG-Profile ever

Mir isch grad ke angere Titu i Sinn cho, das isch eifach mi erscht Gedanke gsi woni das Profiu gseh ha uf PG.
I meine mir sis üs ja aui gwöhnt, sgit tonnewiis Profiu mit biuige Föteli uf PG. Aber DAS Profiu hie vor oOannabellaOo isch gloub dr Gipfu. Chleider? Was isch das? Niveau, Stouz… aues Fremdwörter.

Fake-Accounts, eMeidi und süsch Sache

Letscht mau hani ja ä Vorschlag gschribe gha wieme öpis gäge Fake-Accounts chönnt ungernäh und augemein d Qualität vor PG-Community steigere. Dürne Artiku vom eMeidi ischmr auerdings bewusst worde, dass das ja garnid im inträsse isch vo PG. Sie wei doch ke Community mit höcher Qualität und wenige Fake-Accounts, äuä, das isch dene offesichtlech völlig egau. Je meh Fake-Accounts und Mehrfachaccounts, desto meh „User“ uf PG = „meistbesuchtes Freizeitportal der Schweiz“.

Dr eMeidi hetsech z.B. mit völlig sinnlose Date chönne registriere, nidmau ä Postleitzahl wird überprüft! Pinlecher geits nüm. Würklech eifach nume piinlech.

Wennmr scho bim eMeidi si, da muess sich ja mitere Grichtsverhandlig usenang setze, wüuer vo PG aklagt isch worde daser ihne Schade zuegfüegt het. Da es ihm glunge isch d Passwörter vo PG-User ohni grossi asträngig usezläse etc. Aues nachzläse ufm blog vom eMeidi. Itz wirder tatsächlech aklagt vo PG uf Schadeersatz. Drbi het er die Lücke ersch veröffentlecht nachdem ers PG gseit het und sies gflickt hei. Eigentlech sötte sie ihm quasi no dankbar sii dass er sie druf ufmerksam het gmacht dass ihri Sicherheit schlichtweg nid vorhande isch gsi. Aber äbe, läset nech am beste säuber dür d Artikle bim eMeidi. Hoffe er chunnt heil us dere Sach use.
Sorry PG, aber es wird eifach immer pinlecher.
Drbi fingi ds Prinzip vor Site ja würklech cool.